MAMLAKA ya Kudhibiti na Kupambana na Dawa za Kulevya (DCEA) imekamata basi la abiria aina ya Yutong linalomilikiwa na kampuni ya Abood, lenye namba ya usajili T 181 EMJ, likiwa limebeba kilogramu 101.2 za dawa za kulevya aina ya mirungi katika eneo la Tegeta Kibo, jijini Dar es Salaam.
Pia mamlaka hiyo imemkamata msimamizi wa hosteli ya wanafunzi, Semvua Sangi (31), iliyopo mtaa wa Nyasa, Kijitonyama, jijini Dar es Salaam, akiwa na pakiti 144 za bangi aina ya skanka ambazo zilipatikana zikiwa ndani ya chumba chake katika hosteli hiyo.
Akizungumza leo Aprili 13, 2026, jijini Dar es Salaam na waandishi wa habari, Kamishina Jenerali wa DCEA, Aretas Lyimo, amesema takwimu zinaonyesha ongezeko la ukamataji wa mirungi, ambapo kilogramu 1,267.12 za dawa hizo zilikamatwa, zikichukua asilimia 64 ya dawa zote zilizokamatwa mwezi huo.
Amesema katika kipindi cha mwezi Machi 2026, imefanikiwa kutekeleza operesheni kubwa ambapo jumla ya dawa za kulevya zenye uzito wa kilogramu 1,983.31 zilikamatwa.
“Basi hili lilikuwa likifanya safari kati ya Mombasa, Kenya, na Dar es Salaam, Tanzania, ambapo dawa hizi zilikuwa zimefichwa kwenye mfumo wa hewa (AC) wa basi hilo, ambapo watuhumiwa watano walikamatwa, wakiwemo dereva wa basi hili, Ramadhan Mohamed (52), na kondakta wake, Salma Sanga (26),” amesema.
Amesema pamoja na dawa hizo, mtuhumiwa alikutwa na kifaa cha kuchanganya bangi hizo, kuchakata, kufunga kwenye paketi ndogo ndogo na kusambaza.
“Tukio hili linaashiria uwepo wa mienendo ya biashara ya dawa za kulevya katika maeneo yanayozunguka taasisi za elimu,” amesema.
Aidha, mamlaka hiyo imetoa wito kwa jamii, hususani wamiliki na wasimamizi wa makazi ya wanafunzi, kushirikiana na vyombo vya dola kuhakikisha mazingira ya wanafunzi yanabaki salama.
Amesema hali hiyo imechangiwa na mkakati wa mamlaka kuelekeza juhudi zake katika operesheni za kutokomeza matumizi ya dawa za kulevya kwenye mashamba, baada ya kufanikiwa kudhibiti mitandao ya usafirishaji wa dawa za kulevya kwenye viwanda.
Aidha, amesema kemikali bashirifu zenye uzito wa kilogramu 3,012.5 na lita 17,960 pia zilikamatwa, huku vidonge 286 na chupa 1,001 za dawa tiba zenye asili ya kulevya zikigundulika. Katika operesheni hiyo, watuhumiwa 77 walikamatwa na mamlaka hiyo, na pia magari 9, pikipiki 12, na bajaji moja vilikamatwa.
KUKAMATWA KWA MIRUNGI KATIKA MAENEO MBALIMBALI YA NCHI
Matukio kadhaa ya ukamataji wa mirungi yaliibuka katika maeneo mbalimbali, likiwemo tukio kubwa lililotokea jijini Dar es Salaam, ambapo basi la abiria aina ya Yutong la kampuni ya Abood lenye namba ya usajili T 181 EMJ lilikamatwa likisafirisha kilogramu 101.2 za mirungi.
Katika mkoa wa Pwani, kilogramu 419.09 za mirungi zilikamatwa zikielekea Dar es Salaam, huku tukio jingine likifanyika mkoani Mwanza, ambapo kilogramu 52 za mirungi zilikamatwa zikiwa zimefichwa katikati ya mizigo mingine kwenye gari aina ya fuso.
MATUKIO YA UKAMATAJI WA DAWA ZA KULEVYA ZAIDI
Vilevile, Kamishina Jenerali Lyimo amesema mkoa wa Tanga ulikamata kilogramu 32.95 za mirungi zilizokuwa zimefichwa kwa ujanja ndani ya maembe. Katika tukio hilo, Seif Omar (38), mjumbe wa Serikali ya Mtaa wa Taifa, Barabara ya 13, alikamatwa.
Amesema katika mkoa wa Arusha, wilaya ya Longido, kilogramu 106.25 za mirungi zilikamatwa zikisafirishwa kwa gari aina ya Toyota Wish, huku watuhumiwa wawili wakikamatwa.
“Mkoa wa Kilimanjaro uliona ukamataji wa kilogramu 68.3 za mirungi kutoka kwa watuhumiwa Amin Mazua (58) na Wilbard Mchau (50), na mkoa wa Songwe ulikamata kilogramu 8.2 za bangi aina ya skanka kutoka kwa mtuhumiwa Lwitiko Kapambila (39),” ameongeza.
Aidha, amesema kukamatwa kwa kemikali bashirifu na dawa tiba zenye asili ya kulevya pamoja na mirungi, kemikali bashirifu zenye uwezo wa kutumika katika uzalishaji wa dawa za kulevya zilikamatwa katika ukaguzi wa makampuni mbalimbali.
Jumla ya kilogramu 3,012.5 na lita 17,960 za kemikali bashirifu, pamoja na vidonge 286 na chupa 1,001 za dawa tiba zenye asili ya kulevya, vilikamatwa. Dawa hizi ni pamoja na alprazolam, midazolam, na fentanyl, ambazo hutumika kutibu maumivu, lakini endapo zitatumika kinyume cha utaratibu, zinaweza kusababisha uraibu mkubwa.
WITO KWA JAMII KUSHIRIKIANA NA VYOMBO VYA DOLA
Mamlaka ya Kudhibiti na Kupambana na Dawa za Kulevya imeendelea kuhimiza jamii kushirikiana katika kupambana na tatizo la dawa za kulevya, hasa kwa wamiliki na wasimamizi wa makazi ya wanafunzi, ili kuhakikisha maeneo haya yanabaki salama na kuwa hifadhi ya elimu na si mahali pa biashara haramu ya dawa za kulevya.
Operesheni za Machi 2026 zimeonesha dhamira thabiti ya serikali ya kukabiliana na tatizo hili la kitaifa. DCEA inaendelea kufanya kazi kwa karibu na vyombo vya ulinzi na usalama, wadau mbalimbali, na wananchi ili kuhakikisha hatua kali za kisheria zinachukuliwa kwa wahalifu wote, bila kujali hadhi yao katika jamii.
