Na Asella Denis
Kila tarehe 9 Desemba, Tanzania inaadhimisha Siku ya Uhuru, na leo inaadhimisha Miaka 64 ya Uhuru wa Tanzania Bara, tukio muhimu linalokumbusha hatua za maendeleo na umoja wa taifa tangu kupatikana kwa uhuru mwaka 1961.
Katika maadhimisho hayo, Rais wa Jamhuri ya Muungano wa Tanzania, Samia Suluhu Hassan, ametumia mamlaka ya kikatiba aliyopewa chini ya Ibara ya 45(1)(a)-(d) ya Katiba ya 1977 kutoa msamaha kwa wafungwa 1,036, hatua iliyothibitishwa na taarifa iliyochapishwa na The Citizen tarehe 9 Desemba 2025.
Kwa mujibu wa taarifa hiyo, wafungwa 22 wameachiwa huru, huku 1,014 wakipunguziwa adhabu zao na kuendelea kutumikia sehemu ya vifungo vilivyobaki. Uamuzi huo umezingatia vigezo vya kisheria, tathmini za kitabia na mapendekezo ya mamlaka zinazohusika na usimamizi wa magereza.
Hatua ya msamaha imetajwa kuwa sehemu ya jitihada za Serikali kuhamasisha mageuzi ya kitabia kwa wafungwa, kupunguza msongamano gerezani na kutoa nafasi ya kuanza upya kwa wale walioonyesha mfano mzuri. Serikali imesisitiza kuwa msamaha huu unaendana na maadili ya taifa ya utu, msamaha na mshikamano katika kuadhimisha Miaka 64 ya Uhuru.
