Wakala wa Nishati Vijijini (REA) umeendelea kung’ara mkoani Mara baada ya kuonesha mafanikio makubwa katika ziara ya uhamasishaji wa miradi ya nishati vijijini. Wananchi wamejitokeza kwa wingi kujiunga na huduma ya umeme pamoja na kuonesha mwitikio chanya kuhusu matumizi ya nishati safi ya kupikia.
Katika ziara hiyo, REA imetoa elimu kwa wananchi kuhusu taratibu rahisi za kuomba kuunganishiwa umeme na namna ya kunufaika na huduma hiyo katika shughuli za kiuchumi na kijamii. Lengo limekuwa kuongeza idadi ya watumiaji wa umeme na kuchochea maendeleo katika sekta za biashara, kilimo na huduma za kijamii.
Aidha, kampeni ya kuhamasisha matumizi ya nishati safi ya kupikia imepokelewa vizuri na wananchi, ambapo wameelezwa faida zake ikiwemo kulinda afya, kuhifadhi mazingira na kukuza usawa wa kijinsia.
Vilevile, wananchi wamekumbushwa umuhimu wa kuzingatia usalama katika matumizi ya umeme, kutunza miundombinu ya umeme pamoja na kushirikiana na Serikali, REA na wakandarasi ili kuhakikisha miradi ya nishati vijijini inatekelezwa kwa ufanisi.
Uhamasishaji huo ni sehemu ya jitihada za Serikali za kuhakikisha wananchi wa vijijini wanapata nishati bora, salama na ya kuaminika kwa ajili ya kuboresha maisha yao.
