Na Mwandishi Wetu.
MOROGORO: Shirika la Viwango Tanzania (TBS) limeendelea kuonesha dhamira yake ya kuimarisha afya, umoja na mshikamano miongoni mwa watumishi wake kupitia ushiriki wake katika Mashindano ya Shirikisho la Michezo la Mashirika ya Umma, Taasisi na Makampuni Binafsi Tanzania (SHIMMUTA) 2026, yanayofanyika mkoani Morogoro.
Mashindano hayo yaliyoanza Novemba 6, 2026, yanatarajiwa kuhitimishwa Novemba 21 mwaka huu, yakikutanisha watumishi kutoka taasisi za umma na kampuni binafsi nchini katika michezo mbalimbali kwa lengo la kuimarisha afya, kujenga mahusiano na kuongeza mshikamano nje ya mazingira ya kawaida ya kazi.
Katika mashindano hayo, TBS imeshiriki kwa kupeleka timu katika michezo mbalimbali ikiwemo mpira wa miguu kwa wanaume, netiboli kwa wanawake, mpira wa wavu kwa wanawake na wanaume, mchezo wa kuvuta kamba, pamoja na michezo ya jadi inayojumuisha drafti, pool table na karata.
Hadi Novemba 12, 2026, baadhi ya timu za TBS zilikuwa zimeonesha matokeo ya kuridhisha kwa kufanikiwa kufuzu hatua za makundi, zikiwemo timu za mpira wa miguu, mchezo wa kuvuta kamba, netiboli na mpira wa wavu kwa wanaume, hatua inayodhihirisha maandalizi na ushindani wa timu hizo katika mashindano ya mwaka huu.
Akizungumza na waandishi wa habari Novemba 12, Kaimu Mwenyekiti wa Michezo wa TBS, Bi. Mary Massawe, amesema timu ya shirika hilo iko katika hali nzuri na imejipanga kikamilifu kufanya vizuri katika mashindano hayo, kwa lengo la kutafuta ushindi na kulitangaza shirika kupitia michezo.
Amesema TBS imeingia katika mashindano ya mwaka huu ikiwa na dhamira ya kufanya vizuri zaidi, ikizingatiwa mafanikio iliyoyapata mwaka jana, ambapo timu ya mchezo wa kuvuta kamba ilifanikiwa kufika fainali na kutwaa nafasi ya pili.
Bi. Massawe amesema kwa mwaka huu timu hiyo imejipanga kuongeza juhudi na kuhakikisha inafanya vizuri zaidi kwa kulenga kutwaa nafasi ya kwanza.
Aidha, kwa niaba ya wanamichezo wengine, amemshukuru Mkurugenzi Mkuu wa TBS, Dkt. Ashura Katunzi, pamoja na Menejimenti ya shirika hilo kwa ushirikiano, motisha na mazingira mazuri wanayowapatia wanamichezo, akieleza kuwa mchango huo umekuwa chachu ya kuwajengea wachezaji morali na ari ya kupambana kutafuta ushindi.
Amesisitiza kuwa ushiriki wa TBS katika SHIMMUTA si suala la ushindani pekee, bali pia ni sehemu ya juhudi za kuimarisha afya za watumishi, kukuza urafiki, umoja na mshikamano, pamoja na kuongeza ufanisi katika maeneo yao ya kazi.
Kaulimbiu ya SHIMMUTA 2026 ni “Michezo Ituunganishe, Kuelekea AFCON 2027”, ikiwa na msisitizo wa kutumia michezo kama nyenzo ya kuwaunganisha Watanzania na kuhamasisha ushiriki katika shughuli za michezo.
Kupitia mashindano hayo, TBS imefanikiwa kuwaunganisha takribani watumishi 65 wanaoshiriki katika michezo mbalimbali, ikiwa ni sehemu ya kuunga mkono jitihada za Rais wa Jamhuri ya Muungano wa Tanzania, Dkt. Samia Suluhu Hassan, za kuhamasisha utunzaji na uimarishaji wa afya za watumishi nchini.
Kwa ujumla, ushiriki wa TBS katika SHIMMUTA 2026 unaonesha umuhimu wa michezo katika kujenga watumishi wenye afya bora, mshikamano na ari ya kazi, huku shirika hilo likiendelea kuweka matumaini ya kufanya vizuri na kuongeza mafanikio katika mashindano yanayoendelea mkoani Morogoro.
